سعد الصغير: بوسي سجنت جوزها وشوفتها بعيني وهي مكتفاه

كذّب  الفنان والمطرب الشعبي سعد الصغير المطربة الشعبية بوسي التي قالت إنها اتصلت به وطلبت منه ألا يتدخل في المشكلات بينها ووالدها، قائلا: «والمصحف ده ما كلمتني يا كدابة، كلمت وسيط وقلت له يقولك أبوكِ بيقولك أنا آسف مردتش عليّ ومكنتش عاوزة تحل مع أبوها».

وأضاف الصغير في حواره مع الإعلامية بسمة وهبة، مقدمة برنامج «العرافة»، على قناتي المحور والنهار: «في يوم الفرح أرسلت رسالة لوالدها طالبته فيها بأن يرتدي بدلة وأخبرته بأنها ستخصص له سيارة تحضره للفرح».

وتابع المطرب الشعبي: «اللي حصل إنها ثبتته عشان تمنعه يجي الفرح، وكل شوية يكلمني وأقوله إن شاء الله جاية ومرضتش أقوله إنها ثبتته لأني مكنتش عارف أقوله ايه».

وقال سعد الصغير : «يا بوسي أنا واقف معاكي بقالي 10 سنين، كلمتها قلت لها إحنا مش عاوزين حاجة قولي لأبوكي أنا مسامحاك، لكنها مرضتش تسامحه خالص»، بحسب تعبيره.

وأشار إلى أن العلاقة كانت قريبة جدًا بينه وبين الفنانة، معقبًا: «كنا عيلة.. بخلص شغل الهرم كنا بننام عند بوسي لأن عندهم فيللا دورين»، وفقًا لوصفه.

ولفت إلى أن الفنانة استغاثت به حتى يخرجها من أزمتها مع طليقها، منوهًا أن الأخير جعلها توقع على 30 وصل أمانة.

ونوه أن بوسي، استعانت بأناس حتى تُقيد طليقها، مضيفًا: «كتفت جوزها وجابت ناس وضربته بالشبشب على وشه، الراجل قال أنا عاوز 4 مليون جنيه، إديته مليون جنيه وبعدين اتحبس».

وذكر أن الفنانة أخطأت عندما تسببت في دخول طليقها السجن، قائلًا إنها السبب في دخوله السجن، بشهادة المنتج أحمد السبكي والمطرب محمود الليثي وشريف فشور وحمدي بدر.

واستطرد: «كلهم كانوا قاعدين وهي اعترفت إن هي اللي حبست زوجها.. ارفعي عليا قضية ممكن أكون أنا كداب».